Les for meg - no!

Savnet

2012-01-13T10:26:00.027+01:00

Dette er den fjerdje boka Kaia, Bendik og Trond Brænne har skrive om hesten, grisen, høna, kaninen og skjæra som er gode vener og bur på ein gard. I denne boka byrjar skjæra å føle seg utanfor. Ho er den einaste som bur høgt oppe i eit tre, medan dei fire andre dyra held til nede på bakken. Ho føler det som om ho ikkje heilt høyrer til på garden, og for å finne ut av dette spør ho dei andre dyra kva dei meiner. Dei klarar ikkje å gje henne den samkjensla som ho er ute etter, så skjæra flyg skuffa tilbake til reiret sitt. Seinare på dagen oppdagar dei andre dyra at det heng eit saftig eple øvst i eit tre. Dei prøvar på alle tenkelege måtar å få ned eplet, men rekk ikkje opp til det. Sidan grisen er ein klok fyr, får han i oppgåve å tenkje ut noko lurt. Etter å ha tenkt seg godt om kjem han på at dei kan spørje skjæra. Men kor i all verda er det blitt av skjæra? Ho er ikkje i reiret sitt, og ingen andre stader heller, men i stallen finn dei eit brev frå ho. Det er ein invitasjon til innflytningsfest i skjæra sitt nye reir. Tenk at ho har flytta frå dei... Dyra pyntar seg og går på fest. Men no er det deira tur til å kjenne seg utanfor. Det nye reiret er høgt oppe, og det er mange andre skjærer der og. Dyra frå garden kjenner at dei ikkje passar heilt inn. Etter ei lita stund tuslar dei heim og ser på det tomme skjærereiret, og no ser dei alt det positive som dei saknar når skjæra er borte!
Denne boka omhandlar, som dei andre i serien, eit viktig tema: Korleis er vi mot kvarandre? Er vi flinke nok til å setje pris på kvarandre og vise det? Etter å ha brukt den i ei eventyrstund for 3-5-åringar, ser eg at dette kjem godt nok fram til at borna i denne alderen merkar sorga hos skjæra når ho kjenner seg utanfor. Boka er difor eit fint utgangspunkt om ein vil snakke med dei om venskap og om korleis ein kan vise andre at ein bryr seg om dei. Dei sjarmerande teikningane til Per Dybvig er med på å understøtte teksten og kjenslene i boka og hjelper barna å følgje med i handlinga.
Andre bøker om dei fem venene på garden:

He he, Hasse

2011-12-21T10:49:00.003+01:00

Dette er bok nummer to om Ine og Hasse av Tore Renberg og Øyvind Torseter. Hasse og Ine har ein plan om å sprenge den store steinen som ligg i vegen for alt. Dei må berre finne ein dynamittgubbe og tenne på, så ordnar alt seg. Dei tar traktoren og køyrer til skogen, der treff dei elgen, og spør om han har dynamitt. Elgen har ikkje meir att og så må dei leite vidare. Dei treff fleire dyr, men ingen har dynamitt. Til slutt kjem ugla på at kanskje grevlingen har ein gubbe eller to å avsjå. Det har grevlingen og så blir det sprenging, eit digert hol blir det - men kva skal dei gjere med dette holet? Hasse har ein god ide, men for å få vite kva det er må du lese boka!

Draumar

2011-12-21T10:31:00.000+01:00

Ei veslesyster som ikkje får sove, for ho er redd for draumane. Då er det godt å ha ein storebror som kan fortelje om dei gode draumane. Han fortel om reiser både på vegen, til havet, i havet, ja, til og med til månen. Sjølv om veslesyster trur ho ikkje klarer å bake, symje eller tisse i skogen så kan ho det i draumen. Her er det berre gode draumar og ingenting å vere redd for.
Det er Gyrid Axe Øvsteng som har laga teksten og Per Ragnar Møkleby som har illustrert boka. Illustrasjonane er laga i blandingsteknikk med collage på foto i fleire av dei. Detaljane i bileta gjer dette til ei bok om høver godt til samtale og både tema og bilete.

Borte vekk!

2011-12-06T14:08:00.001+01:00

Mina sin mamma kan gjere tusen ting samstundes, men ho klarer og å rote vekk mykje. Då er det bra at Mina er flink til å følgje med på kva mora gjer, slik at ho kan finne igjen det mora har rota vekk. I denne boka får vi høyre om når mamma har mista lesebrillene sine. Mina og mamma skal reise til byen for å kjøpe nye briller, men før dei kan reise må mamma finne lommeboka. Då er det fint at Mina tenkjer etter og finner ut at den må ligge i kjøleskåpet! Men så er nøklane borte og då må Mina til å leite ein gong til. Tru om ho finn dei og om dei då kan reise til byen?
Dette er ei kjekk lita bok om ei rotete mamma og ei flink og oppmerksam jente. Boka er skriven av Ingvild Nielsen og illustrert av Inger Lise Belsvik. Det er ein del tekst, men bileta stør teksten og utfyller slik at det blir mykje og sjå på og snakke om. Vi las denne boka i eventyrstund med barn frå 3 - 5 år noko som fungerte svært bra.

Tannpusser-grisen Olli

2011-11-14T15:25:00.001+01:00

Tøygrisen Olli, tøymusa Louis og tøytigeren Lily bur hos store Markus. Kvar kveld må Markus fortelje eit eventyr før leikene kan legge seg og sove. Ein kveld er Markus alt for trøyt til å fortelje noko, for leikene har brukt altfor lang tid på å pusse tennene. Tigeren Lily synest at tannpuss er keisamt, men då fortel Olli at tannpuss kan vere både spennande og farleg, ja, han har sjølv arbeidd som tannpusse-gris i fleire år! Dei andre trur ikkje noko på dette, før Olli viser dei utstyret sitt! Han har vore tannpussar i dyrehagen og pussa tennene på kenguruar, elefantar, sjiraffar, løver, krokodillar og mange fleire. Dei andre tøydyra er skikkeleg imponert og det blir nok du og når du les om korleis Olli pussa tenna på krokodillen!

Ei humoristisk, fin biletbok om tannpussing. Boka er skriven på bokmål. Passer for dei eldste i barnehagen og dei som går i første klasse.

Albert tuller med tall

2011-11-04T12:41:00.001+01:00

Albert Åberg er ein kjent og kjær ven for mange boklesarar. Denne gongen skal han feire geburtsdag og Albert og pappa tullar veldig med tal. Kva treng vi tala til? Å ringe i telefonen. Datoen for fødselsdagen. Betale i butikken. Tal har vi rundt oss heile tida og då er det lurt å vite litt om korleis dei oppfører seg. Dette er ei bok som høver for barn som har begynt å telle, for her er det og små oppgåver som dei kan bryne seg på.

Den lille penselen

2011-08-29T12:45:00.004+02:00

Kva gjer du når du er ein liten malarpensel som aldri blir brukt? Denne boka handlar om den vesle penselen som bur saman med dei store penslane hos målaren Edvard Munch. Den vesle penselen prøver å trenge seg fram, men blir alltid jaga tilbake i kroken. Ein dag då han prøver veldig hardt vert dei andre penslane så sinte på han at dei kastar han ut av skåpet. Kva skal han gjere no? Heldigvis hjelper feiekosten han og saman klarar dei å skremme ein tjuv, slik oppdagar Edvard Munch den vesle penselen. Edvard blir glad i den vesle penselen og malar eit av dei mest kjende bileta sine med han. Så neste gong du ser på maleriet Skrik kan du sjå etter dei fine strekane i bilete og då veit du kven som har laga dei!
Boka har ganske mykje tekst, men og fine og humoristiske illustrasjonar så dei på fire og fem vil nok ha glede av denne. Boka er skriven av Bjørn F. Rørvik og illustrert av Thore Hansen

Karsten + Petra på biblioteket

2011-08-19T10:59:00.027+02:00

Dette er den 23. boka om Tor Åge Bringsværd og Anne Holt har laga om dei gode venene Karsten og Petra. Karsten og Petra er bestevenner, og dei gjer mykje kjekt saman. I bøkene om dei får me vere med på noko av det kjekke dei gjer. I denne boka besøker dei biblioteket. Der som Karsten bur er det eit stort bibliotek med eigen barneavdeling. Her får Karsten god hjelp til å finne bøker som han likar, og om laurdagen er det ofte eventyrstund eller dokketeater. Petra bur lengre borte, og der er det ikkje noko bibliotek, men ein gong i månaden kjem bokbussen som nesten er som eit vanleg bibliotek. Karsten og Petra får låne seg bøker på bokbussen, og etterpå går dei heim til Petra for å leike bibliotek. Bøkene om Karsten og Petra er koselege kvardagshistorier, og har vore populære hjå barn i alderen 2-5 år i mange år.

Fleire bøker om Karsten og Petra:

og endå fleire fins.

Den lille helten og kattekidnapperen

2011-08-09T11:05:00.009+02:00

Karin er liten - for liten synes dei store barna. Og sjølv om Karin veit at ho aldri får vere med å leike med dei, spør ho likevel. Og det fantastiske skjer: i dag får Karin vere med å leike...ho kan få velje om ho vil vere ufødd løve eller ein nabo som ingen liker. Karin vel å vere ufødd løve. Då må ho liggje heilt stille i magen til løvemammaen og utvikle seg, medan dei store barna leikar og leikar og leikar...og løveungen vert aldri fødd. Men plutseleg oppdagar barna at katten, Ulrikke, er borte. Og dei veit at det bur ein kattekidnappar i nabolaget... Brått er leiken over, og Karin får vere med å leite etter Ulrikke, men dei finn han ingen stader. Tilslutt finn dei ut at dei må lure seg inn til kattekidnapparen og finne katten. Men kven tør å gjere det? Då viser det seg at det ikkje alltid er så dumt å ha med minstemann likevel, for Karin tør - og alle er einige om at det er minst sjanse for at ho vert oppdaga sidan ho er så lita. Dei store borna står utanfor og heldt vakt. Karin ringjer på hos kattekidnapparen, vert invitert inn i det skumle huset, finn Ulrikke der, men kjem ikkje ut igjen. Kan det ha skjedd noko med henne? Har kattekidnapparen laga kattemat av henne? Dei store barna vert meir og meir nervøse...

Heldigvis endar alt godt, og det viser seg at småsøsken kan vere tøffare enn dei store, og at kattekidnappare heldigvis ikkje alltid er ekte kattekidnappare.

Eit stort og eit lite monster

2011-08-02T13:19:00.007+02:00

Skald forlag har gjeve ut to bøker som handlar om kjensler.
Den første boka heiter: Nei! sa Veslemonster og handlar om korleis Veslemonster kjenner seg når Storemonster kjem på besøk og alltid skal vere den som bestemmer. Men Veslemonster greier til slutt å si Nei! og då viser det seg at Storemonster slett ikkje har tenkt over at Veslemonster kan bli skremd og lei seg. Storemonster lovar at han skal ikkje bestemme alt heile tida, berre Veslemonster ikkje skrik til han.

Den andre boka heiter: Store monster græt ikkje. Denne handlar om Storemonster som helst ikkje vil vere saman med Veslemonster for han får til alt mogeleg. Storemonster får ikkje til å lage så fine teikningar som Veslemonster og han forstår ikkje alt som Veslemonster fortel. Då kjenner han seg så dum, men han græt ikkje! Veslemonster synest far til Storemonster er rar, men Storemonster seier ingenting og han græt ikkje, men når Veslemonster ler høgt av far hans då græt Storemonster og fortel korleis han kjenner seg. Veslemonster seier at han kan noko som Veslemonster ikkje kan, han kan svømme. Storemonster lærer Veslemonster å svømme og neste gong Storemonster er lei seg så veit han at store monster kan gråte.

Dette er to bøker som tar kjensler og grenser på alvor. Når vi snakkar med barna om å respektere kvarandre er dette to fine bøker å lese som ein start på ein samtale.

Sov søtt, herr Spiss

2011-06-24T14:48:00.004+02:00

Erna Osland har laga teksten og Inger Lise Belsvik har illustrert denne fagbiletboka. Det er herr Spiss som er hovudpersonen og som fører oss til møte med dyr som søv på ulike måtar. Teksten er på rim og gjer at den er lett å lese. Illustrasjonane gjer teksten svært tydeleg og det er morosamt å følgje herr Spiss på ferda. Bak i boka er det ein fakta som fortel om korleis og kvifor dyr og menneske søv. Denne boka kan brukast både til underhaldning, men og til å lære noko nytt. Visste du at spissmus nesten ikkje har tid til å sove?

Hva gjør de voksne når vi ikke ser?

2011-06-24T14:27:00.005+02:00

Det er klart barn lurar på kva dei vaksne gjer når dei ikkje ser kva dei heldt på med! I denne boka går spørsmålet igjen på anna kvart oppslag og svara er oppfinnsame og for ein vaksen medlesar ganske tankevekkande. For kva finn dei på når barna har gått og lagt seg? Støvsuger dei støvdottar eller finn dei monster under senga? Koser dei seg med fisk og gulrøter eller finn dei fram potetgullet? Det er aldri greit å vite med desse vaksne, difor er denne boka god å ha, slik at vi kan snakke litt om desse tinga.
Terje Borg og Inger Lise Belsvik har laga denne boka saman i 2009.

Anna Bache-Wiig/ Lisa Aisato: Don Fridtjof.

2011-05-25T09:25:00.003+02:00

Don Fridtjof er ein katt som terroriserer alle han kjem i nærleiken av. Han jagar fuglar, hundar, mus og menneske, til og med matfar freser han til. Ja, Don Fridtjof trur han er verdas tøffaste og kulaste katt som kan gjere akkurat det han vil. Han skremmer alle rundt seg og er verkeleg ufordrageleg. Slik går dagane heilt til det kjem ei dansemus som set seg på matfatet til Don Fridtjof og ertar han. Då vert han så rasande at han spring etter musa. Ja, så rasande vert han at han gløymer å sjå etter kor han spring. Plutseleg er både han og musa langt oppe i eit tre, så langt oppe at han ikkje tør å klatre ned. Don Fridtjof hyler og skrik, men kven vil hjelpe ein som ikkje er grei? Ugla kjem og kjeftar på han, for han har sete seg på hennar balkong! Han ber ugla hjelpe seg, men ugla seier at det er berre ein måte å kome ut av dette på – kva trur du det er? Trur du at han kjem ned att?
Boka er gitt ut på Cappelen Damm i 2010. Teikningane er fulle av humor og gjev lesar og medlesar mykje å sjå på og snakke om.

Pablo møter naboane

2011-05-04T12:54:00.005+02:00

Pablo er ein liten rev. Han har to søsken, Poppy og Pelle. Dei bur i eit lite hol i hagen til katten Fredrik. Ein dag tenkjer Pablo: "Kvifor lever vi i slikt eit lite hol, når Fredrik lever i slikt eit stort, fint hus?" Pablo vil gå på besøk til Fredrik og smett inn gjennom døra til huset, søskena hans vert og med. Først kjem dei til kjøkenet - oj, all den herlege mate! Dei et det dei finn av kyllingbein og pølse, men er maten eigentleg til dei? I stua finn dei ein stor, mjuk sofa - kjempegøy å hoppe i! Tenk så moro Fredrik må ha det! Pelle kikkar inn i eit anna rom, men der et det noko som vil slåst. Hjelp, det er nokon som vil ta meg, skrik Pelle, men Poppy seier at denne tingen (støvsugaren) er heilt daud. Dei spring vidare og rotar til der dei kjem. Plutseleg høyrer Poppy noko! Det er menneska som bur der som kjem att! Kva skal dei gjere no?

Dette er ei bok med store, fargesterke bilete og enkel tekst, her er det mykje humor og ikkje minst noko å snakke om.

Svein Nyhus: Sånt som er

2011-04-19T14:27:00.006+02:00

Ei ny bok frå Svein Nyhus er alltid spennande. Denne gongen skriv han om Eli som ikkje har nokon å leike med. Ho har berre ein tom koffert! Men Eli kan rope, så ho roper på lyset som lager ei opning i mørkret slik at ho kan se, finne og leike og ikkje minst legge ting i kofferten. Ho roper på havet, fjellet, treet, dyret, røvaren, flamma og kvelden og alle har noko ho kan få og legge i kofferten. Så roper ikkje Eli meir, ho lyttar til kofferten og då kjem det ein annan som ho kan gjere noko saman med, i morgon kanskje?

Boka er bygd opp slik at venstresida på kvart oppslag viser Eli som roper og på høgresida ei rekke eksempel som utdjupar det ho leiter etter. Eit oppslag viser t.d. Eli som roper på lyset og presenterer slike ting som lyser: ei morgonsol, eit smil, eit blink, ein TV, lysa på ein bil, augo på ein katt i mørkret osb. Det er nesten som eit leksikon og det inviterer lesarane til å finne nye ord som kan passe inn. Her er det mykje å sjå på og snakke om. Ei bok til å lese fleire gonger.

Mamma Mø faller og slår seg

2011-03-31T13:33:00.024+02:00

Mamma Mø er ei litt uvanleg ku, sjølv om bonden ikkje heilt har skjønt det. Når bonden er i nærleiken er ho nemleg ganske normal og blir stelt med som andre kyr, men når bonden ikkje ser slår Mamma Mø seg laus. Kråka er Mamma Mø sin beste ven, og ofte prøver ho å dempe kua sine ville påfunn utan heilt å få det til. I denne boka vil Mamma Mø hoppe over gjerdet for å ta ein tur på stranda, men desverre sklir ho og riv seg opp på piggtråden. Bonden kjem og set eit svært plaster på riften, så får han Mamma Mø i fjøset så ho får kvile. Desverre gjer han ingenting med kulen i panna, sjølv om den gjer forskrekkeleg vondt. Når kråka kjem flygande vert ho overraska over å finne Mamma Mø i fjøset på ein fin dag, men ho skjøner fort at Mamma Mø treng trøst og hjelp. Ho går med på å fly til fryseboksen for å hente noko kaldt å leggje på kulen, men når ho kjem tilbake er ho dårleg, og vond og kald i magen, og fortel at fryseboksen er tom... Mamma Mø får likevel ein spinatpakke på kulen, og nyt både kulden frå pakka og spinaten som etterkvart renn nedover fjeset hennar. Kråka, derimot må heim og leggje seg.

Bøkene om Mamma Mø og Kråka er humoristiske og kjekke å lese både for vaksne og barn.

Fleire biletbøker om Mamma Mø og Kråka:

Tigli

2011-03-24T14:12:00.006+01:00

"Tigli har rosa hår. Det er kjempestort.Det er større enn alle bladene og greinene på et digert tre. Større enn et hus." Slik byrjar Bjørn Arild Ersland og Annlaug Auestad si fabulerande bok om Tigli. Og mykje av handlinga i denne boka føregår nettopp i dette håret. For i håret til Tigli veks det sukkertøy og karamellar, is, brus og mykje anna godt. Og det beste av alt: alle som vil får lov til å spise av håret til Tigli. Brannvesenet kjem med stigebil og plukkar snop frå buskar ingen andre rekk. Men ein dag skjer det noko som ikkje skal skje: Brannmesteren forsvinn i håret og dei finn han ikkje att. Politi og ordførar leitar, men dei finn han ikkje. Helikoptrane flyg rett over hovudet til Tigli i jakta på brannmesteren, men heller ikkje dei finn noko. Men Tigli veit råd, og boka endar godt med ein nøgd brannmester og ein sovande Tigli.

Med denne boka har Bjørn Arild Ersland skrive ei fantasifull bok som passar særleg godt til snopeglade born. Bileta til Annlaug Auestad spelar på lag med teksten og gjer dette til ei fantastisk bok for barn i fleire aldrar. Sjølv om boka er veldig rosa er denne historia like kjekk for gutane som for jentene!

Bernt Bjørn skal bade

2011-03-10T16:23:00.009+01:00

Daniel Napp har skrive to humoristiske bøker om Bernt Bjørn. Bernt Bjørn er ein stor, snill brunbjørn som gjer ein del rare ting. Han er god ven med gullfisk, og i denne boka skal han og gullfisk på badetur. Når dei kjem til badeplassen sin står Oter der og fiskar. Oter vert sint fordi dei skremmer fisken, og han seier at sjødraugen kan komme - og han et bjørnar! Bernt Bjørn blir livredd, men gullfisk vil bade likevel. Bernt Bjørn blir på land og passar på at ikkje sjødraugen kjem. Brått forsvinn bollen til gullfisk ned i vatnet, og Bernt Bjørn trur at det er sjødraugen som kjem og tek vennen hans. Han mannar seg opp, kler på seg alle baderingane sine og spring uti for å redde gullfisk. Med alt utstyret på seg liknar han mistenkeleg på ein sjødraug, så gullfisk går til motverje og dreg ut alle pluggane i baderingane. Resultatet vert at Bernt Bjørn fyk avgarde som ein rakett og sprett opp av vatnet rett framfor oter som har funne seg ein ny fiskeplass.

Bøkene om Bernt Bjørn inneheld morosame historier med endå meir morosame illustrasjonar. Skrifta er stor og lett å lese. Passar godt som høgtlesing til barn i alderen 3-8 år, og som eigenlesing for born som nett har lært å lese sjølv.

Andre bøker om Bernt Bjørn: Bernt Bjørn skjønner ingenting

Kubbe lager museum

2011-02-03T15:00:00.007+01:00

Kubbe er ein liten kubbe som bur langt inni skogen. Kvar tysdag har Kubbe turdag. Då finn han mykje fint som han tek med seg heim: kvist og kvast og ting som folk har mista. Når han kjem heim frå tur legg han alt det han har funne utover heile stovegolvet, så nyttar han bøker til å finne ut kva han har funne før han sorterer ting i esker og skuffer. Men ein dag er det ikkje plass i eskene og skuffene lenger, og Kubbe lurer på kva han skal gjere. Bestemor råder han til å lage museum, noko Kubbe gjer med liv og lyst. Og museet vert ein suksess, på opningsdagen er det kjempelang kø og Kubbe er frykteleg stolt. Han viser gjestene rundt i museet og fortel om alle tinga han har funne, og folk likar museet og historiane. Men ein dag oppdagar Kubbe at han er lei av å bu i eit museum og han saknar det gamle livet sitt. Så han bestemmer seg for å stenge museet. Men kva skal han då gjere med alle tinga? Han fotograferer alt og lager eit fint album der han skriv ned historiene sine. Deretter legg han tinga tilbake der dei høyrer heime.

Boka om Kubbe er illustrert av forfattaren, Åshild Kanstad Johnsen, som har lagt inn mange detaljar i bileta som det er kjekt for borna å finne. Kubbe er ein sjarmerande og uttrykksfull figur som mange born vil kjenne seg att i. Boka er fin å lese for born som likar å leite etter detaljar og for born som likar å samle med seg ting dei finn. Den kan og brukast til å introdusere borna for museumsverda, eller berre som ei kjekk kosebok. I tillegg til alt dette er skriften stor og god å lese, så for born som har knekt lesekoden er den ei kjekk lese-sjølv bok.

Fiat og farmor i vilden sky av Iben Sandemose

2011-01-27T13:34:00.008+01:00

Dette er den 6. boka Iben Sandemose har skrive om Fiat og farmor, og alle seks er like fargerike, fabulerande og humoristiske.

I denne boka skal farmor fly, og Fiat får vere med. Farmor har flyskrekk og kvir seg, og i tillegg pakkar ho med seg så mykje rart at Fiat må gje henne ein mindre koffert. For kva skal ein til dømes med støvsugar, sag og musefelle i kofferten?

Farmor synes at det er skummelt å skulle fly, sjå at koffertane forsvinn på bagasjebandet, at flyet ristar og på toppen av det heile må ho på do høgt der oppe i lufta. På heile turen må Fiat roe farmor ned, og det klarar ho heldigvis. Tilslutt landar flyet, og Fiat og farmor kjem ut i ei varm verd med store dyr i.

Denne boka er fin å bruke som ein lese-snakke-bok om ein skal ut å fly for første gong, eller om vaksne eller barn er redde for å fly. Men om ein ikkje skal fly er den og ei fin, humoristisk bok med flotte og morosame illustrasjonar. Boka passar for born frå 2-3 år og oppover til dei første åra i skulen.

Eg er ein frosk

2010-12-28T14:07:00.005+01:00

Kurt Johannessen har skrive og Øyvind Torseter har illustrert denne vesle boka om frosken : som akkurat skal til å ete ei fluge. På neste oppslag skal han: ete ei fluge og ein elefant. Slik går det side etter side - frosken et og tenker på det neste som kan hende frå han skal til å ete fluga og til han faktisk har gjort det. Kurt Johannessen fabulerer og let mikrosekundet omfamne fantastiske hendingar medan vi som les kjenner oss att i gleda ved å assosiera. Øyvind Torseter lager fine tablå av frosken sine tankar og skaper noko nytt ved å konstruere scenane i forteljinga. Fargane lyser mot deg, dette er ei bok til å få energi av!

Leselykke; inspirasjonsbok om barn og lesing

2010-12-13T14:52:00.006+01:00

Bokklubben har for nokre år sidan (2008) gitt ut ei bok om barn og lesing. Målgruppa er foreldre med barn i alderen 0 - 8 år og målet er å oppdage kor kjekt det er å lese for barn og saman med barn. Leseforskarar skriv om leseutvikling på dei ulike aldersstega og fleire kjende personar skriv om lesing og om sine eigne favoritt bøker. Boka har både generelle tips og heilt konkrete titlar som høver for den einskilde aldersgruppa. I føreordet får vi ein presentasjon av bidragsytarane og ei innføring i korleis du kan bruke boka. Eit av tipsa er å lese kapittelet før og etter barnet sin alder, for ikkje alle følgjer den vanlege utviklinga, nokre ligg føre og andre treng litt meir
tid.

Ei anna bok som kom ut i 2003 og som handlar om omlag det same er:
Liv Engen si bok: Foreldrenes ABC. Hvordan oppmuntre barns leseglede og leselyst. Boka er gitt ut i serien For deg som vil lære mer, Damm forlag. Boka liknar ei Leseløve-bok, men er altså stila til den vaksne og har som mål å gje hjelp til den vaksne som har barn i skule-start alder. Boka er delt inn i seks kapittel og eit etterord, kvart kapittel tek føre seg ulike sider ved lesing og skriving og går ganske nøye inn på korleis den vaksne kan vere med på å gje barnet ei positiv oppleving av å skulle lære å lese og skrive. Eit av råda er å sjå på seg sjølv ikkje som trenar, men som leikekamerat i den språklege utviklinga!

Stina Wirsen: Hvem....?

2010-10-19T12:54:00.022+02:00

Stina Wirsen har skrive ein serie på 9 bøker som passar godt for dei minste. Bøkene handlar om ein liten bamse som kjem borti mange situasjonar som små (og litt større) barn lett kan kjenne seg att i. Bileta er gode å sjå på, og utrykksfulle. Borna ser lett kva for kjensler som rører seg i bamsen og dei andre skikkelsene som er med i bøkene. Desse bøkene er difor, i tillegg til å vere gode å lese, og gode å nytte til samtale med barna om ulike kjensler, venskap og andre tema.

Hvem er sint? handlar om bamse som bygger tårn. Ein gul katt kjem og vil vere med, men bamse vil leike aleine. Då vert katten lei seg og øydelegg for bamse. Begge vert sinte og byrjar å slåss, heilt til dei byrjar å grine. Tilslutt vert dei vener og byrjar å leike saman, og alt ender heldigvis godt.

Hvem bestemmer? Er det den store eller den lille bamsen som bestemmer? Den store bamsen meiner det er den, men den lille er ikkje heilt einig. Alle foreldre vil kjenne seg att i problematikken, og boka kan vere eit bidrag i samtalen om kvifor dei vaksne av og til må bestemme over borna.

Hvem er alene? Bamse er åleine, og vil gjerne leike med nokon. Men alle er så opptatt, ingen har tid til å leike med bamse. Då vert bamse lei seg, men finn på noko å gjere åleine. Etterkvart vert det så kjekt at ho gløymer at ho eigentlig ville leike med nokon. Ein kan vere åleine sjølv om ein ikkje vil det, men ein kan og vere åleine fordi ein vil det.

Andre bøker i denne serien:

Johannes Jensen opplever et mirakel

2010-06-10T18:12:00.005+02:00

Dette er den tredje boka Henrik Hovland har skrive om Johannes Jensen. I den første boka (Johannes Jensen føler seg annerledes) er Johannes Jensen ein einsam krokodille midt blandt alle menneska. I den andre boka (Johannes Jensen og kjærligheten) blir han kjæreste med Frida. I denne tredje boka bur han saman med Frida, og dei har det kjekt saman. Men ein dag oppdagar han at Frida har ein hemmelighet. Han byrjar å spionere på ho, og ser at ho går på venninnebesøk, i butikkar, og på legekontoret. Samstundes veks magen til Frida, og han skjønar at hemmeligheten hennar er inne i magen. Tilslutt spør han kva ho har i magen, og får vite at ho har ein baby - og at han kan få lov til å vere far. Johannes Jensen synes dette høyres spennande ut, men han har eit problem: Han kan ikkje syngje...og han meiner at ein far må kunne syngje for babyen når den skal sove. Johannes Jensen grublar på problemet sitt, og han får god hjelp til å løyse det. Tilslutt kjem babyen, og Johannes Jensen og Frida kan fortsetje å ha det kjekt saman - saman med Mirakelet sitt.

Bøkene om Johannes Jensen fortel på ein enkel måte om dei store tinga i liva våre: Korleis er det å få ein ven? Ein kjærast? Eit barn? Johannes Jensen er ein naiv krokodille som stiller enkle spørsmål og som får enkle svar på dei, og boka passar difor svært godt til barn frå to-tre -årsalderen og oppover.

Makwelane og krokodillen

2010-06-10T14:46:00.006+02:00

Makwelane er ei sørafrikansk jente som er oppkalt etter eit musikkinstrument. Det mennesket ho elskar aller høgast er bestemor gogo. Men fordi ein må gå eit godt stykke langs elva der den utspekulerte krokodillen bur for å kome til bestemor gogo, får ikkje Makwelane lov til å gå dit aleine. Ein dag klarar ho endeleg å overtyde foreldra om at ho er stor nok til å klare det. I gleda over å få lov, overhøyrer ho alle advarslane om den utspekulerte krokodillen. På vegen møter Makwelane sjølvsagt den utspekulerte krokodillen, men ho trur berre at det er ein stor firfirsle. Derfor fortel ho krokodillen kor ho skal. Den utspekulerte krokodillen er verkeleg utspekulert, og skjønar at hvis han er rask og smart nok kan han ete både bestemor gogo og Makwelane til formiddagsmat. Han skundar seg difor avgarde til bestemor gogos hus, og er framme før Makwelane. Omsider, rett før ho er framme, skjønar Makwelane kven det er ho har snakka med. Ho tek til å springe og rope, og klarar å avlede krokodillen som nett då skal til å ete bestemor gogo. Det vert ein kamp mellom Makwelane og krokodillen, men tilslutt klarar Makwelane å stoppe krokodillen ved å dytte instrumentet sitt inn i krokodillens gap.
Historia om Makwelane og krokodillen er spennande og har i tillegg flotte illustrasjonar. Den har klare parallellar til eventyret om raudhette og ulven, og for barn som er glade i dette eventyret vert den kanskje endå meir spennande. Handlinga og illustrasjonane foregår i Afrika, i Zululand, og gjev eit godt bilete av korleis livet er der.

Når prinsesser våkner om natten

2010-06-10T14:16:00.009+02:00

Det er skummelt å vakne om natta av rare lyder - for prinsesser og. Men prinsessa i Per Gustavssons univers er av det nyfikne slaget, i tillegg til å vere modig. Ho går ned i kjellaren for å sjekke kva som lagar lydane, og undervegs møter ho ein edderkopp, ein vaktmester, eit skjelett og ein frosk som alle åtvarar ho mot å gå ned i kjellaren. Det store kjellartrollet har nemleg vakna, og han et prinsesser som godteri. Prinsessa gjev seg likevel ikkje, ho vil ned i kjellaren og passe på at kjellartrollet sovnar att. Ho tar seg likevel tid til å hjelpe dei ho møter undervegs: Edderkoppen får krona hennar, vaktmesteren som misser buksene sine får prinsessebeltet, skjelettet som frys får kappa, og frosken som ikkje tåler vatn på føtene får prinsessestøvlene. Som takk vert dei alle saman med for å hjelpe henne mot kjellartrollet. Kjellartrollet er stort og skummelt og veldig klart for litt prinsesseknask når dei kjem fram til det. Men sidan prinsessa har gitt bort prinsesseutstyret sitt vert det veldig forvirra - for kven av dei er eigentleg prinsessa? Trollet tek til å gruble, og etter å ha grubla ein stund sovnar det. Når troll sovnar, søv dei i 496 år - minst. Det veit prinsesser, så ho gjev han prinsessekrona si og kan endeleg leggje seg til å sove ho og.

Bøkene til Per Gustavsson er kjekke å lese, både for liten og stor. Han snur om førestillingane om prinsesser som små, søte skapningar som berre sit og ventar på ein mann, og gjer dei modige, tøffe og hjelpsame. Språket er lett, og bileta gode å sjå på.

Andre bøker i denne serien: Sånn gjør prinsesser, Når prinsesser fyller år og Når prinser fanger drager.

Farvel, herr Muffin

2010-05-11T15:51:00.003+02:00

Alle skal vi dø ein gong og i denne boka er det herr Muffin, eit sju år gamalt marsvin, sin tur. Han tenkjer tilbake på livet sitt og alt han har opplevd. Han finn ut at han har hatt det veldig godt. Jenta som eig herr Muffin skriv vakre brev til han om døden og legg dei i postkassa hans. Der finn han dei og tygg dei i stykker. Ein dag klarar ikkje herr Muffin å tygge i stykker brevet han får, i staden legg han seg ned og døyr. Familien som eig han legg han i ei skoeske og lagar ei vedig gravferd med blokkfløytespel, salmesang og mange tårer. Etterpå konkluderer jenta i eit nytt brev til herr Muffin at no er det han som veit best kva som skjer etter at vi er død. Boka er skriven av Ulf Nilsson og nydeleg illustrert av Anna Clara Tidholm, og tar opp temaet død på ein varsam og fin måte. Den kan lesast for barna for å gjere dei kjende med eit vanskeleg tema og gjerne som eit utgangspunkt for ein samtale om døden. Den kan og vere fin i ein bearbeidings-prosess om ein har mista nokon ein var glad i, eller kjenner ein som skal døy. Ikkje minst er det og ei fin historie for alle som ønskjer det.

Kokos og vennene hans

2010-05-11T15:42:00.005+02:00

Tor Åge Bringsværd har tidlegare skrive mange bøker om Karsten og Petra. No kjem han ut med ein ny serie, om Kokos. Kokos er ein koseelefant som Petra har fått i bursdagsgave av Karsten. Han bur på rommet til Petra og er god venn med hunden Basse, og med løveungen og Frøken kanin som det og fins eigne bøker om. Denne første boka handlar om korleis Petra fekk Kokos, og korleis vennene tok imot han og lagde eit eige hus til han på rommet. Me får og vere med Kokos ut i hagen, der han får ri på basse og helse på alle smådyra som bur der. Historia er enkelt fortalt og passar difor godt til dei yngste førskulebarna. Anne Holt har illustrert den, og i tillegg til ei vanleg bok er dette og ei Leit og Finn-bok. På kvar side er der teikningar av ting som gøymer seg i biletet. For barna kan det vere kjekt å leite etter desse tinga.

Arkimedes og brødskiva

2010-05-11T15:27:00.005+02:00

Eureka har ein pappa som er oppfinnar. Han har mellom anna prøvd å finne opp firkanta såpeboblar. Dei har ein katt som heiter Arkimedes. Pappa har lært Eureka om to viktige naturlovar: 1. Kattar landar alltid med føtene ned, og 2. Brødskiver landar alltid med smørsida ned. Ein dag byrjar Eureka å gruble på desse to naturlovene: Kva skjer om brødskiva er festa på ryggen til katten? Med smørsida opp...? Som den oppfinnardattera ho er må Eureka prøve dette ut, men det går ikkje heilt som ho hadde tenkt....

Hans Sande sine bøker om Eureka og Arkimedes er fabulerande og morosame. Bileta teikna av Gry Moursund bygger opp under historia og er samtidig svært uttrykksfulle og morosame. Bøkene er skrivne på nynorsk, og passar for ca 3 år og oppover. Dette er bøker også vaksne kan le av.

Andre bøker om Eureka og Arkimedes: Arkimedes og rulletrappa og Arkimedes i prompeland.

Fisketelleboka

2010-05-11T15:15:00.006+02:00

Er barnet ditt fasinert av livet i sjøen? Og treng det kanskje å øve på å telje? Då er dette rette boka! På kvart oppslag møter vi ein ny art. Torsk, steinbit, krabbe og sju andre dyr som lever i sjøen skal vi telje i denne boka. Bileta som er laga av Solveig Serigstad Hauge er fine og detaljerte og viser godt korleis dei ulike slaga ser ut. Åse Enerstvedt har skrive teksten som går på rim og er lett å følgje med på. Anbefales for barn frå 0-5 år.

Bø og Bæ

2010-05-11T14:36:00.010+02:00

Olof Landström har skrive sju bøker om dei to sjarmerande figurane Bø og Bæ. Bø og Bæ gjer mange ting som ikkje er så lure og dei gjer ting me kan kjenne oss igjen i. I kvar bok dukkar det opp eit problem som må løysast, og dei løyser seg ofte på litt overraskande måtar. Bileta i bøkene er enkle, men uttrykksfulle og sjarmerande, og bidreg til at bøkene er gøye å lese. Bøkene passar godt for dei minste, men er og populære hjå barn som nett har lært å lese sjølv.
I Bø og Bæ til sjøs bestemmer dei to vennene seg for å ro ein tur. Plutseleg går dei på ei grunne - og der vert dei sitjande. Heldigvis har dei med seg ei stor matkorg, men tida går og det har blitt mørkt før ein racerbåt kjem forbi. Bø og Bæ vert glade og viftar med eit kvitt lommetørkle, men sauene i racerbåten køyrer berre forbi. Heldigvis for Bø og Bæ lagar båten så store bølgjer at dei blir vippa av grunnen og kan ro heim i frem og ro.

I Bø og Bæ i skogen skal dei plukke bær. Dei finn ikkje så mange, så dei tek ein matpause i staden. Plutseleg oppdagar Bæ ein maur på brødskiva til Bø, deretter er det maur på saftglaset og det viser seg at dei har sete seg midt i maurstien. Dei rømmer frå maurene, og det blir litt dramatikk på vegen. Mens dei rømmer finn dei ein flott blåbærplass, og alt endar heldigvis godt.

Andre bøker om Bø og Bæ: Bø og Bæ i festhumør, Bø og Bæ gjer reint, Bø og Bæ blir våte, Bø og Bæ får besøk og Bø og Bæ i vinden.

Bukkene Bruse på badeland

2010-05-11T13:49:00.006+02:00

Bukkene bruse er på veg til setra for å gjere seg feite, men på veg dit går dei forbi eit nytt skilt; Badeland 200 m, står det på skiltet. Bukkane vert nysgjerrige og bestemmer seg for å ta ein titt, og når trollet dukkar opp må dei kjempe mot det i nye og uvante omgjevnader. Sjølvsagt endar alt bra, slik det skal gjere i eit ekte eventyr. Boka er ein fabulerande variant av eventyret om dei tre bukkene bruse, der Bjørn F. Rørvik har skrive ein morosam tekst som følgjer handlingsgangen til det tradisjonelle eventyret. Gry Moursund har teikna fargesterke, flotte, morosame og detaljrike bilete som er kjekke å sjå på for barna. Boka anbefales barn i alle aldre, og særleg dei som kjenner eventyret om bukkene bruse frå før.

Okke, Nutte og Pillerill

2009-11-23T11:36:00.009+01:00

- er tre små figurar som lever i den svenske skogsverda ( eller norske , eller kor som helst ? ). Eikenøttgutane Okke og Pillerill er full av spilloppar, og ein dag vert dei send ut av frustrerte vaskedamer for å levere attende alle dei nyvaska skjegga til nissene og dei fæle trolla. Og borte vert dei. Dagen går.

Fru Eikenøtt er bekymra og Kurre Ekorn melder seg til søketeneste. Vesle Nutte Hassel heng seg på i halen til Kurre og avstad går det i hopp og sprett. Undervegs spør dei alle dei møter etter dei to bortkomne, men korkje fru Skjære eller mange andre er særleg til hjelp. Nutte og Kurre skil lag. Nutte får hjelp av ei firfisle etter at det skumle Morkeltrollet har trua med å rise dei to som har tulla vekk skjegget hans!! Nutte spør fortvila to nissar etter vegen heim, men brått riv dei av seg skjegget og der står Okke og Pillerill. Og det vert nye eventyr på dei tre små før Kurre Ekorn plukkar dei opp, og skjenner på dei og riser dei heile vegen heim. Og så vert det gledesfest i skogen !
Boka går på rim og er på bokmål. Gode og koselege, teikingar ( akvarell ) både i fargar og svart/kvitt illusterer teksten. Frå ca 4 år og oppover i skulealder ,- og gjerne før eller etter skogsturen.

Pinne-bøkene av Lena Anderson

2009-10-20T15:03:00.008+02:00

Lena Anderson har skrevet 3 vakre bøker om Pinne. Pinne er eit omsorgsfullt og veldig sosialt piggsvin som har mange venner.

Den første boka om Pinne heiter Pinne får besøk. Den handlar om Pinne, som er heilt åleine og ventar på besøk. Boka er forma som ei teljebok, og me tel kvar venn som kjem innom henne. Vennene vert trakterte etter beste evne, og det vert eit hyggeleg selskap.

Den andre boka heiter Pinne har ein løyndom. I denne boka er Pinne svært løyndomsfull. Ho har det travelt med husrydding og klesvask, og har ikkje tid til å få vennene på besøk. Venene undrar seg, og det gjer me og. Men løyndomar er til for å bli avslørte, og ein dag kjem Pinne ut med ein liten baby. Ho har halde svangerskapet hemmeleg, og hatt det travelt med å gjere huset klart til den nye verdsborgaren, og når han endeleg er komen får venene igjen komme på besøk.

Den tredje og siste boka om Pinne er Pinne, grisen og vesle vennen. I denne boka har tilveret med ein baby normalisert seg, og Pinne og babyen har det roleg og godt. Plutseleg høyrer Pinne knirking frå porten og vert glad med tanken på å få besøk. Men den besøkjande har gått vidare, og pinne står igjen og ropar og lurer på kven det er. Seinare sit ho og vesle Grisen og babyen og et suppe, då det bankar på døra. På trappa står ein liten grisunge og har gått seg bort. Som alle andre gjester vert ho invitert inn til suppe og ei god seng, med løfte om å finne mora dagen etterpå. Dagen etter tar grisen ho med til byen, og der finn ho heldigvis mora si. Mora er like glad, for ho har leita både natt og dag . I premie for å ha funne den vesle grisungen får dei 100 bollar, og sjølvsagt vert det fest!

Alle bøkene om Pinne er utgjeven på nynorsk og skrevet på rim. Dei er fine å lese høgt, og bileta er gode å sjå på.

Alle døde små dyr av Ulf Nilsson

2009-10-20T14:36:00.004+02:00

Dette er forteljinga om Ester, Putte og ”eg” som startar gravferdsbyrå. Sidan dei ikkje veit om nokon som er døde, må dei leite etter dei. Fuglar, dyr og insekt får alle flotte gravferder der barna les opp eigenkomponerte dikt og pyntar med kors og blomar. Putte er så liten at han ikkje heilt skjønar dette med døden, så undervegs fortel Ester og ”eg” om det å dø. Boka tek opp eit vanskeleg tema på ein litt humoristisk og ufarleg måte. Samstundes gjev den oss anledning til å snakke med barna om døden. Passar for born frå 3-4 år.

Reidar og den store magen av Selma Lønning Aarø

2009-10-20T14:16:00.004+02:00

Reidar skal bli storebror, men han skjønar ikkje heilt vitsen. Mora fortel at ho har svelgt eit frø som begynte å vekse i magen, og Reidar et eit graskarfrø for å kjenne korleis det smakar. Om natta drøymer han at frøet tek til å vekse i magen hans. Det veks kjempefort, og snart har han like stor mage som mora. Mora tek han med til ultralyd, og der vert det stor oppstandelse når det viser seg at han har eit graskar i magen. Media vert tipsa, og Reidar vert superkjendis med paparazziar rundt seg heile tida. Når eit tv-show i USA ringer og ønskjer å operere ut graskaret på direkten av verdas nest beste lege, seier Reidar ja. Men det går ikkje heilt som planlagt…
Historia er spennande, og kan passe for barn frå ca 4 år og oppover.

Mina og Kåre

2009-10-09T15:12:00.007+02:00

Mina og Kåre er to bjørnar som deler hus og har det fint med det.
Men ein dag slepp Kåre ei bombe på Mina: Han skal ut og reise og oppleve den spennande verda der ute. Med ei oppfordring til Mina at ho må hugse å vatne blomane , så dreg han! Mina får ikkje vere med. Ho blir både sint og lei seg, kryp under bordet og kjenner seg redd og utrygg. Ein dag kjem det eit brev med bilete frå Kåre som er i Vietnam og et froskar. Dette hjelp på humøret til Mina og ho tek til å bake og rydde og vente på Kåre. Langt om lenge, kjem Kåre heim att. Han har mange gåver med seg og fortel ivrig om reisa si. Brått eksploderer Mina og brøler : ”Hvordan kunne du reise frå meg ” og det går opp for Kåre kor lei seg ho må ha vore. Dei får snakka litt om det og etter ei lang stund er alt bra att…
Men ein aprilmorgon seier Mina: ”Jeg skal ut å reise jeg!”
Lita bok om kjensler : å bli forlatt og kjenne seg einsam, bli venner att - og gje att med same mynt. Forfattar er Anna Höglund ( sv.) og boka kom ut på Mangschou forlag 2005
Enkle teikningar med få fargar som illustrerer teksten og boka passar for dei frå 3- 4 år og oppover.

To og to

2009-10-09T14:56:00.009+02:00

Når alt land forsvinn og det er berre vatn på alle kantar,
går det ein liten pungnesebjørn på eit skip og kjenner seg einsam .
Veldig einsam! For alle dei andre dyra er to. Han går til biblioteket for å finne ut litt mer om pungnesebjørnar :” Ursus Nasale Excentricae ; et sympatisk, men sjeldent dyr”. Han går på dansegolvet for å treffe damer, men å danse med en skilpadde eller eit nasehorn er neimen ikkje så lett. Etter ein del tapre forsøk havnar han ute på ein taukveil på dekk.Og endeleg … skjer det noko. Og han får danse heile natta med nokon som har akkurat same steg og som luktar godt.
Vakker lita bok om å vere einsam og lengte etter ein sjelevenn og finne ein.
Frå 4-5 år og oppover til 100.
Forfattar og illustratør er Lars Elling og kom ut i 1997.

Kafé Haletippen

2009-10-07T10:39:00.004+02:00

Dette er den første forteljinga om Reven og ”den retthalede grisen”. Boka er skriven av Bjørn F. Rørvik og illustrert av Per Dybvig. Reven samlar på halefjør i eit album, han har berre to og Grisen meiner at det er litt lite. For at Reven skal få fleire fjør i samlinga si lager dei ein kafé og serverer det beste fuglar veit og som betaling må dei ut med ei halefjør. Kafeen går strålande! Grisen er kelner og fyk fram og tilbake med ordrar til Reven og halefjør frå Suppegjøk, Snublefink, Spøkefugl, Russisk skjeggfugl, Pipestilk og Hermegås står fint og strålar i ein kopp på disken. Det er nesten ikkje mat att då ein Slukhals kjem og vil ha noko etande, han er lite nøgd med det som er igjen og spør Grisen kva for rett det er som står på disken. Grisen seier det er Urigiburgskispuk og kan absolutt ikkje etast! Slukhalsen bryr seg ikkje om det og et alle fjøra Reven har fått som betaling! Alt arbeide er til inga nytte! Reven sørgjer, men så finn Grisen ei lang grøn halefjør som Slukhalsen har mista, den tek han med til Reven og Reven er igjen ein lukkeleg og leiken rev.

Dette er ei bok som høver godt til høgtlesing for små og store. Mykje språkleg glede og utforsking.

Det regner bare på Bastian

2009-09-17T15:27:00.010+02:00

Bastian er storebror og denne dagen vi møter han er han sint! Illsint! På veslesyster som har øydelagt legoflyet hans, og som hemn syt han for at veslesyster får kjeft av mor for noko ho ikkje har gjort! Veslesyster tek til tårene og Bastian kjenner at han må vekk frå desse tårene og går ut. Men det hjelp ikkje i det heile og til slutt trenger tårene seg på hos han. Han tilstår for mor. Og regnet over Bastian stoggar. Den gode kjensla kjem att og ferske boller og ei blid veslesyster gjer dagen riktig så god att!
Boka er skrive av Peter Gulli og illustratør er Ragnar Aalbu .Teksten er på bokmål.
Dette er ei lita biletbok for dei yngste om sinne, skuldkjensle , anger og den gode kjensla av å gjere ting rett att. Ein situasjon det er lett å kjenne seg att i for dei fleste.
Her er korte setningar og lite tekst på sidene . Illustrasjonane fyller heile arket og er enkle med få detaljar. Frå 2-3 år og oppover.

Ved sjøen

2009-09-14T14:37:00.005+02:00

Ved sjøen av Francoise Vibert-Guigue er ein del av serien ”mine små leksika”. Den fortel på ein enkel måte om livet i og ved sjøen. Bileta støttar teksten, ofte på ein humoristisk måte.

Ingrid har plaster.

2009-09-14T14:20:00.007+02:00

Katerina Jonouch og Marvi Lindham har saman laga boka: Ingrid har plaster, dette er ei lita bok om kor mykje nytte og glede du kan ha av eit plaster eller sju! For kva treng du meir når verda kjennest litt vrang og det gjer vondt både her og der? Ingrid veit! Ho plastrar seg sjølv, dokka, bamsen og alle leikedyr ho kjem over. Det hjelp, alle vert friske, men det må så mykje plaster til at alle øskjer blir tomme. Då må Ingrid kjøpe meir plaster, men det er vel inga sak!
Boka passar for dei minste, men og for fireåringen for her er det mykje å kjenne seg att i.

Puttes eventyr i blåbærskogen av Elsa Beskow

2009-07-31T09:45:00.002+02:00

Dette er ein klassikar som er kjempefin å lese etter ein blåbærtur. Men boka er også både fantasifull og spennande, og kan difor lesast heile året.. Boka handlar om Putte som vil plukke blåbær og tyttebær til mora som har bursdag, men han finn ingen bær. Då kjem blåbærfar og tek han med inn i sitt rike, der blåbærbuskene er store som trær og dei kan snakke med dyra. I blåbærfar sitt rike opplever Putte mykje spennande, og når han kjem tilbake til si eiga verd er kurvane hans fulle av bær.
Boka er skreve på rim, og er derfor lett å lese høgt og god å lytte til, og Elsa Beskow sine teikningar er gode å sjå på. Boka passar for førskulebarn frå 2-3 år og oppover.

Fagbok om lesing for barn

2009-06-22T09:30:00.005+02:00

Les mer! - utvikling av lesekompetanse i barnehagen av Trine Solstad, Universitetsforlaget 2008.

Boka Les mer! handlar om høgtlesing i barnehagen, og gjev svar på dei oftast stilte spørsmåla: Kvifor skal me lese for barna? Kva skal me lese for barna? Og korleis kan me lese for barn i barnehagen?
Forfattaren knytter boka opp mot nyare forskning og rammeplanen for barnehagen, og ho forklarer grundig, men på ein lettfatteleg måte kva fordelar barn har av å bli lest for. Ho kjem og med gode råd i forbindelse med høgtlesning, både når det gjeld refleksjonar rundt bøkene saman med barna, arbeid med bøkene, kva bøker ein bør velje og kvifor, og kva kriterier som bør vere med i eit godt leserom. Forfattaren gjev og litt plass til korleis barnehagen kan stimulere foreldre til å lese for barna heime.

Boka er lett å lese og anbefales til alle som jobbar i barnehage. Den anbefales og til foreldre og andre som er interessert i å vite meir om barn og bøker.

Barnehagebibliotek

2009-05-27T14:18:00.001+02:00

Kva er eit barnehagebibliotek? I Meland kommune er det eit tilbod frå biblioteket til barn og foreldre i barnehagane om å låne bøker i barnehagen. Kvar barnehage har eit depot med bøker som skiftast ut med jamne mellomrom. Desse bøkene kan barna låne med seg heim eller dei kan lesast i barnehagen.
Kvifor opprettar vi barnehagebibliotek? Det er ikkje alltid like enkelt å hugse på når biblioteket er ope, det er heller ikkje så greitt å få tid til å gå på biblioteket, men det er kjempeviktig å lese for barnet ditt! Helst litt kvar dag...
Då kan det vere ei hjelp å få låne bøker i barnehagen! Bøker som barnet kanskje har plukka fram i løpet av dagen eller bøker de finn i lag.